MWENYEZI MUNGU AMKUBALI MAGUFULI

KATIBU wa Mila wa Wilaya ya Mbarali mkoani Mbeya, Mwanasimtwa Mwagongo amesema tukio la kupatwa kwa jua linalotarajiwa kutokea leo katika Kijiji cha Rujewa wilayani hapa ni ishara ya Mwenyezi Mungu kuukubali uongozi wa Serikali ya Awamu ya Tano chini ya Rais John Magufuli.
Hii itakuwa ni mara ya kwanza Tanzania kutokea tukio hilo tangu Aprili 18, 1977 na kwamba tukio kama hilo la kihistoria linatarajiwa kutokea tena nchini Mei 21, 2031.
Mbali ya Rujewa ambako wataona kupatwa kwa jua kwa asilimia 97 sawa na miji ya Makambako, Masasi, Mbeya, Tunduru, Njombe na Sumbawanga, miji mingine ambayo itaona tukio hilo kwa ukaribu zaidi wa asilimia 96 ni Katavi, Nachingwea na Songea ikifuatiwa na Kigoma, Iringa, Mtwara na Lindi.
Akizungumza jana na waandishi habari za Utalii na Uwekezaji Tanzania (Tajati) nyumbani kwake katika Kata ya Isisi, Mwagongo alisema tukio hilo la kupatwa kwa jua nchini si mkosi, bali ni sawa na taa iliyokuwa imezimika na sasa imewashwa na kuongeza kuwa, ni ishara kuwa Mungu ameukubali utawala uliopo madarakani na ndiyo sababu ametoa giza na kuleta nuru.
Aliwaasa viongozi wa dini zote kote nchini kuliombea tukio hilo ili lifanyike na kupita kwa amani na pasiwepo na uvunjifu wa amani utakaosababisha jamii kutoa tafsiri ya tofauti baada ya tukio hili la kihistoria ambalo litafanyika kati ya saa 4.15 asubuhi hadi saa 8.00 mchana.
Alisema baada ya tukio hilo, wazee wa kimila watachinja ng’ombe kwa ajili ya kumshukuru Mungu kwa neema ya tukio hilo na pia kumwomba aiepushe jamii na madhara yoyote yanayoweza kujitokeza.
“Hapo zamani watoto walikuwa hawaruhusiwi kutoka nje siku ya tukio hili. Wazee waliamini ni ajali ya kugongana jua na mwezi na wanaoumia ni wanadamu hasa watoto kwa kusababishiwa milipuko ya magonjwa mbalimbali,” alisema katibu huyo na kuongeza:
“Lakini kwa sasa tunatambua kuwa ni tukio la kisayansi na kutokea kwenye eneo letu ni neema kutoka kwa Mungu. Kupitia tukio hili dunia itaijua Tanzania, itaijua Mbarali na itaijua Rujewa. Ni tukio ambalo limetutangaza.”
Kwa upande wa walimu na wanafunzi katika shule mbalimbali mjini Rujewa walionesha kuwa na furaha kubwa ya ujio wa tukio hilo wakisema watapata fursa nzuri ya kujifunza kwa vitendo kwa kuwa watajionea badala ya kusimuliwa au kusoma kwenye vitabu.
Mwalimu wa taaluma katika Shule ya Msingi Isisi, Donatha Nkwera alisema walimu shuleni hapo wamewaandaa wanafunzi kwa ajili ya tukio hilo linalotokea jirani na shule yao.
Wakati hayo yakiendelea, baadhi ya huduma za kijamii zimeonekana kukosekana kutokana na wingi wa wageni waliofika wilayani hapa.
Moja ya huduma hizo ni nyumba za kulala wageni ambapo licha ya vyumba kuwa vya shida pia baadhi ya wamiliki wa nyumba hizo wamepandisha bei za kupanga kutoa Sh 10,000 hadi Sh 30,000.
Kadhalika, huduma muhimu zikiwemo za mawasiliano zilionekana kuwa za shida hadi jana kutokana na umeme kukatika tangu saa mbili asubuhi hadi jioni, hivyo kuleta usumbufu na kukwamisha baadhi ya kazi.

YANGA VS AZAMU TAIFA NI SHIDAAAA!

YANGA na Azam leo zinakutana kwenye Uwanja wa Taifa Dar es Salaam katika mechi ya Ngao ya Jamii kuashiria uzinduzi wa Ligi Kuu inayotarajiwa kuanza kutimua vumbi mwishoni mwa wiki hii.
Timu hizo kwa muda mrefu zimekuwa zikipokezana kijiti kwenye anga za soka la kitaifa na kimataifa ambapo mwaka huu.
Azam ilishiriki michuano ya Kombe la Shirikisho Afrika na kutolewa mapema na Yanga iliyokuwa ikishiriki Ligi ya Mabingwa kabla ya kuangukia kwenye Kombe la Shirikisho ipo hatua ya makundi ya michuano hiyo licha ya kutokuwa na nafasi ya kusonga mbele.
Mara ya mwisho timu hizo zilikutana kwenye fainali ya Kombe la Shirikisho la TFF katika Uwanja wa Taifa ambapo Yanga ilishinda mabao 3-1. Aidha Yanga iliendelea kuitambia Azam tena katika mechi ya ngao ya Jamii msimu uliopita ambapo iliichapa kwa mikwaju ya penalti 8-7 baada ya kutoka sare ya bila kufungana kwa dakika 120 .
Katika mechi ya leo, Yanga itashuka dimbani ikitoka kupata ushindi wa bao 1-0 katika mchezo wa Kombe la Shirikisho Afrika dhidi ya Mo Bejaia Jumamosi iliyopita baada ya kucheza mechi nne mfululizo kwenye michuano hiyo bila ushindi.
Lakini pia, ikiwa na rekodi ya kupoteza michezo kadhaa iliyopita ya michuano hiyo dhidi ya TP Mazembe 1-0, Medeama ugenini (3-1) na nyumbani (1-1), Mo Bejaia ugenini (1-0).
Yanga sasa inasubiri kukamilisha ratiba dhidi ya Mazembe katika mechi ya mwisho ya makundi baada ya kutokuwa na nafasi ya kufuzu nusu fainali ya michuano hiyo kutokana na ushindi wa mabao 3-2 wa Medeama dhidi ya Mazembe mwishoni mwa wiki iliyopita.
Kocha Mkuu wa Yanga Hans Pluijm alisema jana kuwa wamesahau yaliyopita na matarajio yao ni kushinda mchezo wa leo ili kuwa na mwanzo mzuri wa maandalizi ya Ligi Kuu Tanzania bara wakiwa mabingwa watetezi.
“Hakuna timu yoyote inayotutisha na kila siku tumekuwa tukifanya mazoezi na kujiimarisha, lengo letu ni kuendeleza rekodi ya kushinda mataji,” alisema.
Huenda Yanga ikawakosa wachezaji wake muhimu kama kipa Ally Mustafa ‘Barthez’ anayesumbuliwa na maumivu ya kifundo cha mguu, mabeki Juma Abdul, Andrew Vincent ‘Dante’ wanaosumbuliwa na maumivu ya miguu, Kevin Yondani anayeumwa jicho na kiungo Obrey Chirwa anayeumwa goti.
Aidha, mchezo wa leo utakuwa ni mtihani mkubwa wa kwanza kwa Kocha Mkuu wa Azam Mhispania Zeben Hernandez ambaye aliahidi kurejesha imani ya mashabiki wa Azam FC kwani anatarajia kutumia mfumo wa pasi nyingi ambao unatumiwa na timu ya Ligi Kuu Hispania ‘La Liga’ Barcelona.
Timu hiyo imefanya maandalizi ya muda mrefu na kucheza mechi kadhaa za kirafiki ikiwa ni sehemu ya maandalizi yao ya ligi. Ilicheza dhidi ya URA ya Uganda (1-1), dhidi ya Friends Rangers (2-1), Ashanti United (2-0), Mshikamano (1-0), Kombaini ya Wilaya ya Mjini (1-0), Taifa Jang’ombe (1-0), na sare mbili ilipocheza na JKT Ruvu (1-1) na Ruvu Shooting (1-1).
Akizungumzia mchezo huo Hernandez, aliweka wazi kuwa ana uhakika mkubwa wa kuifunga Yanga kwenye mchezo wa leo kwani tayari amepata kikosi chake cha kwanza baada ya michezo hiyo ya kirafiki.
“Siwezi kuzungumzia sana mechi ya Yanga kwa sababu naamini ya kuwa jitihada zangu na taaluma ninayowapa wachezaji wangu naamini itatoa matunda, lakini natambua ya kuwa Yanga ni timu ya zamani ipo na inacheza vizuri, kikubwa naamini nitashinda mchezo huo kulingana na kile ninachowapa wachezaji wangu,” alisema.
Azam FC huenda ikawakosa wachezaji wake Aggrey Morris na Paschal Wawa ambao ni majeruhi wa muda mrefu, ingawa wameshaanza mazoezi mepesi. Lakini pia, wanajivunia usajili wa beki mpya Bruce Kangwa anayetokea Highlanders ya Zimbabwe.

MANJI AMWAGA MANYANGA YANGA

MANJI AAMUA KUKAA PEMBENI YANGA

Habari za uhakika ambazo tumezipata kutoka katika chanzo cha uhakika ndani ya Yanga zinaonyesha kuwa mwenyekiti wa Yanga Bw Yusuf manji ameamua kujiuzulu nafasi yake ya uenyekiti wa yanga pamoja na kusitisha kusudio lake la kuichukua na kuendesha kibiashara timu ya Yanga na nembo yake .
Hili ni anguko kuu kwa yanga endapo Bw Yusuf manji atajionda Yanga kutokana na ukweli kuwa tayari mahasimu wao wa jadi Simba wanakamilisha taratibu za kumkabidhi timu Bw mohamed Dewji MO.
Uamuzi wa manji kujiondoa yanga unatajwa kuchangiwa na shutuma zinazotolewa na baadhi ya viongozi wa serikali, na wengine kutoka ndani ya yanga ambao wanatumiwa na baadhi ya wafanyabiashara kwa maslahi yao binafsi na sio ya yanga.
Manji anaonekana kuchoshwa na tabia za baadhi ya watu kumtukana na kumkebehi kwa hatua yake ya kuichukua timu ya Yanga na sasa ameamua kukaa pembeni kulinda heshima yake .
Hata hivyo viongozi wa Secretary ya yanga siku nzima ya leo wameonekana kuchanganyikiwa uku baadhi wakiwa wanapigana vikumbo kuingia na kutoka quality plaza zilizopo ofisi za Bw manji hatua inayoashiri kuna jambo kubwa linatokea.